Bugundan Botir Zokirov nomidagi Milliy estrada sanʼati institutiga kirish imtihonlari boshlandi
2021/2022-o‘quv yili uchun kirish test sinovlari 2 smenada o‘tkaziladi:
1️-smenada 10:00 dan 11:00 ga qadar;
2️-smenada 12:00 dan 13:00 ga qadar.
Test sinovlari bakalavriat taʼlim yo‘nalishlari uchun 3 ta fan bo‘yicha olinadi. Magistraturaga topshiradiganlar uchun esa chet tili fanidan imtihon olinadi. Bunda belgilangan fanlar har ikkala yo‘nalish uchun ham majburiy hisoblanadi.
Talabgorlarga bakalavriat taʼlim yo‘nalishlari uchun majburiy fanlarning har biridan 10 tadan, jami 30 ta, Magistratura mutaxassisligi uchun faqat chet tili fanining o‘zidan 30 ta test topshirig‘i beriladi.
Diqqat! Imtihonga ajratilgan vaqt javoblar varaqasini bo‘yash bilan birgalikda 1 soatni tashkil etadi.
Bakalavriat taʼlim yo‘nalishlari uchun test sinovlarida to‘plash mumkin bo‘lgan maksimal baho 63 ball bo‘lib, har bir tog‘ri javob uchun 2,1 balldan beriladi. Magistratura mutaxassisliklari uchun esa maksimal natija 50 ballni tashkil etadi.
Eslatma. O‘qish istagida bo‘lganlar test sinovida ishtirok etish uchun ruxsatnomani Davlat test markazining my.dtm.uz saytidan onlayn tarzda yuklab olishlari mumkin.
Diqqat! Talabgorlar test sinovi o‘tkaziladigan hudud, yaʼni Davlat test markaziga ruxsatnomada belgilangan vaqtdan kechikmasdan kelishlari lozim. Bunda ularning qo‘llarida shaxsini tasdiqlovchi hujjat va ruxsatnoma bo‘lishi zarur.
Avvalroq Madaniy meros texnikumlari hamda Estrada sanʼati instituti tashkil etilishi haqida xabar berilgandi.
Olamgir Abdiyev
