Ichki ishlar vazirligi tarkibida jamoat xavfsizligiga masʼul yangi departamenti tuzildi

 

Hujjatga ko‘ra, bir nechta vazifalar Departament zimmasiga yuklatilgan.

 

Jumladan:

• ichki ishlar organlari jamoat xavfsizligi bo‘linmalarining faoliyatini muvofiqlashtirish, kompleks tahlil qilish hamda ularga amaliy-uslubiy yordam ko‘rsatish.

• jamoat tartibini saqlash faoliyatini tashkil etish, jamoat joylarida aholining xavfsizligini taʼminlashda ichki ishlar organlari kuch va vositalarini samarali boshqarish choralarini ko‘rish;

• ichki ishlar organlarining huquqbuzarliklar profilaktikasi borasidagi faoliyatini taʼminlash, profilaktik hisob va maʼmuriy nazoratdagi shaxslarni ijtimoiy moslashtirish ishlarini tashkil etish;

• voyaga yetmaganlar va yoshlar, ayniqsa, ularning uyushmagan qismi bilan manzilli tarbiyaviy va profilaktik chora-tadbirlarni samarali tashkil etish orqali ular orasida huquqbuzarliklarning oldini olish;

• yo‘l harakati xavfsizligini taʼminlash faoliyatini tashkil etish, yo‘l-transport hodisalarining barvaqt oldini olish, transport vositasini boshqarishga doir cheklovlarga rioya etilishini nazorat qilish;

• ozodlikdan mahrum qilish bilan bog‘liq bo‘lmagan jazolarni ijro etishni taʼminlash, probatsiya nazoratidagi shaxslarning xulq-atvorini nazorat qilish, ijtimoiy moslashtirish va qayta jinoyat sodir etilishining oldini olish ishlarini tashkil etish.

 

Departament asosiy vazifalarining o‘z vaqtida va sifatli amalga oshirilishini tashkil etish bo‘yicha shaxsiy javobgarlik Ichki ishlar vazirining o‘rinbosari B.T.Abdullayevga topshirilgan.

 

Maʼlumot uchun, IIV tarkibidagi mazkur bo‘lim "Jamoat xavfsizligi departamenti" deb ataladi.

 

Shuningdek, Farmonda bir oy muddatda tumanlararo patrul-post xizmati bo‘linmalarini tashkil etish meʼyorlarini ishlab chiqish chora-tadbirlari ham Ichki ishlar vazirligiga yuklatilgan. Bunda IIV Moliya vazirligi bilan birgalikda mazkur chora-tadbirlarni amalga oshiradi.

 

Shuni taʼkidlash kerakki, endilikda profilaktika inspektorlarini vazifa va faoliyat yo‘nalishlari bilan bog‘liq bo‘lmagan tadbirlarga jalb qilish taqiqlanadi. Faoliyatiga asossiz aralashish ham man qilingan.

 

Avvalroq So‘nggi 6 oy ichida 1,5 mln. kishi jamoat tartibini buzgani aniqlangani hamda Ichki ishlar organlari xodimlarining eng yaxshilari saralangani haqida xabar berilgandi.

 

Olamgir Abdiyev