Meta qariyb 900 mln dollar jarimaga tortildi: kompaniya foydalanuvchilarning shaxsiy foto va videolariga roziliksiz kirgan
Meta qaror ustidan shikoyat qilishini bildirdi.
Italiya ma’lumotlarni himoya qilish agentligi Meta kompaniyasini Android qurilmalari foydalanuvchilarining foto va videolariga ularning alohida roziligisiz kirgani uchun 805 million yevro (taxminan 887 million dollar) jarimaga tortdi. Bu haqda Reuters xabar berdi.
Agentlik ma’lumotiga ko‘ra, Facebook ilovasidagi foydalanuvchilarga telefon galereyasidagi surat va videolar asosida postlar uchun kontent tavsiya qiluvchi funksiya orqali shaxsiy fayllarga kirilgan. Bunda foydalanuvchilardan aynan ushbu funksiya uchun alohida rozilik olinmagan va ularga bu haqda yetarlicha ma’lumot berilmagan.
Italiya regulyatori Meta kompaniyasiga funksiyani dastlabki holatda o‘chirib qo‘yish va undan foydalanish uchun foydalanuvchilardan alohida rozilik olish majburiyatini yukladi. Buning uchun kompaniyaga 60 kun muddat berildi.
Meta vakilining Reuters agentligiga ma’lum qilishicha, kompaniya qaror ustidan shikoyat qiladi. Uning ta’kidlashicha, ushbu funksiya foydalanuvchilarga Facebook’da surat va videolarni ulashishda yordam beradi. Funksiya ishlashi uchun foydalanuvchilar qurilma sozlamalarida tegishli ruxsatni berishi kerak va uni istalgan vaqtda o‘zgartirishi mumkin. Kompaniya jarimani nomutanosib deb hisoblamoqda.
Reuters qayd etishicha, 2025-yilda boshlangan tekshiruv Meta foydalanuvchilarning foto va videolaridan sun’iy intellekt modellarini o‘qitishda foydalangan-foydalanmaganini qamrab olmagan. Meta bunday maqsadda ma’lumotlardan foydalanilganini avval ham rad etgan.
Shuningdek, Italiya ma’lumotlarni himoya qilish agentligi 2026-yilda ishga tushirilgan, foydalanuvchilarning galereyasidagi kontentni bulutli tizimda qayta ishlash imkonini beruvchi yangi funksiyani alohida o‘rganish huquqini saqlab qolgan.
