Uzr-maʼzur 5 foizlik kompensatsiya bilan yopiladi
UzAuto bekor qilingan mahsulotiga to‘langan summalarni qaytarishni boshladi.
“UzAuto Motors” AJ “Chevrolet Captiva 5” avtomobilini yetkazib berish bo‘yicha bekor qilingan shartnomalarning mablag‘larini qaytaradi va kompensatsiyani amalga oshiradi" - deb yozadi kompaniya.
Eslatma. Kompaniya 2021-yilning 20 noyabr sanasida “Chevrolet Captiva 5” avtomobillarini yetkazib berish bo‘yicha shartnomalar to‘xtatilgani haqida rasmiy bayonot bergan edi.
Mazkur bayonotda mijozlar murojaat qilgandan so‘ng 3 kun ichida tuzilgan shartnomalar bo‘yicha to‘langan barcha mablag‘lar to‘liq qaytarilishi yozilgan. Shuningdek, qo‘shimcha ravishda oldindan qilingan to‘lov summasining 5 foizi kompensatsiya sifatida taqdim etilishi ham ushbu bayonotda keltirilgan.
Kompaniya maʼlumotlariga ko‘ra, “Chevrolet Captiva 5” avtomobili bo‘yicha jami 461 ta shartnoma puli to‘langan.
Shundan 207 nafar xaridor “Chevrolet Captiva 5” avtomobili o‘rniga boshqa avtomobilni olishga qaror qilgan. 161 nafari esa to‘langan mablag‘ qaytarilishi uchun “Uzauto”ga ariza bergan.
Kompaniya xabarida yozilishicha, mazkur 161 nafar murojaatchilarning barchasi allaqachon pullarini qaytarib olishgan. Jami to‘lovchilarning qolgan 41 nafari ham o‘tgan kundan boshlab kompensatsiya sifatida taqdim etilgan 5 foizlik summani olib kelmoqda.
“Qolgan xaridorlar ham o‘z mablag‘lari va kompensatsiyani yaqin ikki-uch kun ichida olishadi”, - deyiladi kompaniya xabarida.
Avvalroq “Chevrolet Captiva 5” to‘xtatilgani sabab ko‘tarilgan bahs-munozaraga deputat Doniyor G‘aniyevning yechim bergani hamda monopolist isteʼmolchilar huquqlarini buzishda davom etayotgani haqida xabar berilgandi.
Olamgir Abdiyev
