Shavkat Mirziyoyev Yevroosiyo iqtisodiy kengashining onlayn sammitida ishtirok etadi
Anjumanda Ittifoq doirasidagi integratsiya jarayonlarini kengaytirish masalalari ko‘rib chiqiladi.
O‘zbekiston Respublikasi Prezidenti Shavkat Mirziyoyev 10-dekabr kuni Oliy Yevroosiyo iqtisodiy kengashining videoanjuman shaklida o‘tkaziladigan navbatdagi yig‘ilishida ishtirok etadi. Bu haqda Prezident matbuot xizmati xabar berdi.
Maʼlum qilinishicha, tadbir Qozog‘iston Respublikasi Prezidenti Qasim-Jomart Toqayev raisligida o‘tadi. Unda Rossiya, Belarus, Qirg‘iziston va Armaniston, shuningdek, tashkilot huzuridagi kuzatuvchi davlat – Kuba yetakchilarining ishtirok etishi rejalashtirilgan.
“Sammit kun tartibiga muvofiq, YOII doirasidagi integratsiya jarayonlarini kengaytirish va ushbu ko‘p tomonlama tuzilma faoliyatini takomillashtirishning dolzarb masalalari ko‘rib chiqiladi”, – deyiladi xabarda.
Maʼlumot uchun: 2020-yil dekabr oyidan buyon O‘zbekiston Yevroosiyo iqtisodiy ittifoqida kuzatuvchi hisoblanadi.
Javohirbek Tursunov
