Xizmat ko‘rsatish sohasida 200 ming ishchi o‘rni yaratiladi – Shavkat Mirziyoyev

 

Prezident boshchiligidagi videoselektor yig‘ilishida shaharlar va yirik tumanlarda xizmatlarni ko‘paytirish uchun ta’lim, tibbiyot, san’at, turizm, uy-joy va transport imkoniyatlarini oshirish kerakligi qayd etildi.

 

"Shaharlardagi aksariyat davlat maktablari 2 barobar ko‘p yuklama bilan ishlayotgani, bog‘cha o‘rinlari yetishmayotgani hech kimga sir emas.

 

Shu bois, shaharlarda xususiy ta’lim xizmatlari qamrovini kengaytiramiz. Buning uchun ham sohaga, ham aholiga katta imkoniyat va yengilliklar yaratayapmiz", - dedi Prezident.

 

Bir oy muddatda aholining haqiqiy ehtiyojini o‘rganib, 100 ta qulay yer maydonlarini belgilab, maktab va bog‘cha qurish sharti bilan auksion orqali tadbirkorlarga berish topshirildi.

 

Umuman, 29 ta shahar va 6 ta yirik tumanda xizmat ko‘rsatish sohasida 200 ming ish o‘rni yaratiladi.

 

Shuningdek, yig‘ilishda Toshkent, Samarqand va Namangan shaharlarida yuqori daromadli xizmatlarni rivojlantirish bo‘yicha alohida dastur qabul qilinishi aytib o‘tildi.

 

Toshkent shahrini ta’lim, tibbiyot, biznes va madaniy-ko‘ngilochar markazga aylantirish bo‘yicha dastur ishlab chiqiladi.

 

"Misol uchun, Sergeli tumanida 16 kilometr uzunlikdagi yer usti metrosi atrofida tungi yoritgich, o‘rindiq, sport va boshqa infratuzilma tashkil etish hisobiga savdo va xizmat ko‘rsatish sohasida 5 mingta ish o‘rni yaratish bo‘yicha taklif bildirilgan. Bunday takliflar menga ma’qul.

 

Yoki, poytaxt tadbirkorlarining shahar hududida san’at, rassomchilik, haykaltaroshlik, hunarmandchilik vakillarini keng jalb qilib, yirik “san’at ko‘chalari”ni yaratish takliflarini ham qo‘llab-quvvatlayman", dedi Prezident.

 

Bundan tashqari, "Fransiya, Italiya, Turkiyadan restavrator va muzey ishi mutaxassislarini olib kelib, barcha muzeylarni zamonaviy qiyofaga keltirish va “omborda chang bosib yotgan” noyob eksponatlarni namoyishga qo‘yishni" tashkil qilish zarurligi ko‘rsatib o‘tildi.