“Qamchiq” dovonida tepalikda qolib ketgan 14 nafar fuqaro qutqarildi
Shuningdek, dovondagi ayrim transport vositalari evakuatsiya qilindi.
Kecha, soat 19:05 da “Qamchiq” Maxsus qidiruv, yong‘in-qutqaruv boshqarmasi navbatchi-dispecheriga kelib tushgan maʼlumotga ko‘ra, “Qamchiq” dovonidan o‘tgan A-373 “Toshkent — O‘sh” avtomobil yo‘lining 242 km shimoliy aylanma yo‘lida ob-havoning keskin o‘zgarishi natijasida tepalikda qolib ketgan 14 nafar fuqaroga yordam kerakligi xaqida maʼlumot kelib tushgan.
Voqea joyiga zudlik bilan “Qamchiq” Qutqaruv otryadidan maxsus texnika hamda qutqaruvchi xodimlar chiqishib, tog‘da qolib ketgan 14 nafar fuqarolar hamda ularning transport vositalarini pastga olib tushish hamda evakuatsiya qilish ishlari amalga oshirildi.
Qutqaruvchilar tomonidan soat 20:10 da barcha fuqarolarni sog‘-omon pastga olib tushildi. Shuningdek, ularni manzillariga yuborishda amaliy yordam ko‘rsatildi.
Hodisa natijasida hech kim tan jarohati olmagan.
