Pele yana kasalxonaga yotqizildi
U bu haqda Instagram sahifasida maʼlum qildi.
Braziliyalik futbol afsonasi Pele ichaklaridagi shish tufayli davolanishni davom ettirish uchun kasalxonaga yotqizilganini maʼlum qildi.
“Do‘stlar, men har oyda bo‘lgani kabi, hozirda davolanishni davom ettirish uchun kasalxonaga ketyapman. Meni qo‘llab-quvvatlagan barchaga minnatdorchilik bildirib qolaman. Hammangizga rahmat”, — deb yozdi Pele Instagramdagi sahifasida.
Avvalroq, Pele yo‘g‘on ichakdagi o‘smani olib tashlash uchun operatsiya qilingan edi. So‘nggi yillarda Pele bir qator sog‘lig‘idagi muammolar bilan kurashib kelmoqda. Jumladan, sonni almashtirish operatsiyasi bilan bog‘liq asoratlar, shuningdek, buyrak va prostata bilan bog‘liq kasalliklarni misol qilib keltirish mumkin.
Pelening hozirda omma oldiga chiqish imkoniyati kam. Biroq u ijtimoiy tarmoqlarda faolligini ko‘rsatib kelmoqda.
Avvalroq, futbol qiroli yana jonlantirish xonasiga yotqizilgani va Neymarning uch oylik tanaffusi yakuniga yetayotgani haqida xabar berilgandi.
Jamshidbek Amirov
