"Bojxona boshqa davlat idoralariga namuna bo‘lishi kerak" — Prezident

 

Biroz avval Prezident Shavkat Mirziyoyev huzurida 2022 yilda bojxona maʼmurchiligini yana-da takomillashtirish va sohani korrupsiyadan xoli tizimga aylantirish bo‘yicha ustuvor vazifalar yuzasidan yig‘ilish boshlangandi.

 

Unda davlat rahbari tizimdagi raqamlarga eʼtibor qaratdi:

 

"So‘nggi besh yilda mamlakatimizning tashqi savdo aylanmasi 2 barobarga - 2016 yildagi 24 milliard dollardan 2021 yilda 42 milliard dollarga oshdi.

Bojxona tizimi mamlakatimizni jahon iqtisodiyotiga bog‘laydigan ko‘prik hisoblanadi.

Bu tizim to‘g‘ri va ochiq-oshkora ishlamasa, tadbirkorlik, investitsiyaga to‘siq bo‘ladi hamda aholining noroziligini keltirib chiqaradi.

Shuning uchun bu sohada 2019 yilda katta islohotlarni boshladik", — dedi Prezident yig‘ilish avvalida.

 

Jumladan:

— bojxona postlarida “yashil yo‘lak”lar joriy etilib, hozirda ular orqali 95 foiz yo‘lovchi va 75 foiz yuk o‘tmoqda;

— avval 12 ta idoradan olingan 60 turdagi ruxsatnomalar “yagona darcha” orqali elektron shaklga o‘tkazildi;

— natijada bojxonada yuklarni rasmiylashtirish vaqti 10 barobargacha qisqardi.

 

Bundan tashqari, bojxona xodimlariga tegishli tartibda imtiyozlar ham beriladi.

Xususan:

— bir oy muddatda bitta postda 3 yil ishlagan xodimlar rotatsiya qilinadi;

— 1 martdan barcha bojxona xodimlari faqat ochiq tanlov asosida ishga qabul qilinadi;

— bojxona tizimida xodimlar daromadi va mol-mulkini deklaratsiya qilish joriy etiladi;

— bojxona xodimlarining faoliyati samarasiga qarab, ish haqiga 50 foizgacha qo‘shimcha ustama to‘lanadi. Bu ustamalar aniq ko‘rsatkichlar (KPI) asosida belgilanadi;

— olis va sharoiti og‘ir postlarda ishlayotgan xodimlar ish haqiga qo‘shimcha ustamalar joriy etiladi;

— bojxona xodimlariga maxsus unvon uchun ustamalar miqdori oshiriladi.