800 gramm chaqaloqda ham operatsiyalar o‘tkazilishi mumkin
O‘zbekistonda neonatal xirurgiya bo‘yicha yangi tajribalar yo‘lga qo‘yilmoqda.
Tibbiyot fanlari doktori Baxtiyor Ergashev SSV matbuot kotibiga bergan intervyusida neonatal xirurgiya istiqbollari va mamlakatda bu bo‘yicha yo‘lga qo‘yilayotgan yangi tajribalar haqida ma’lumotlar taqdim etdi.
“Intensiv palata” tajribasi
— Neonatal xirurgiya o‘quv-davolash-metodik markazimizda yangi tajribani yo‘lga qo‘yganmiz, — deydi muassasa rahbari B. Ergashev. — Ya’ni Xirurgiya bo‘limining o‘zida intensiv palata tashkil etildi. Bu kichik reanimatsiya xonasi bo‘lib, chaqaloq operatsiyadan oldin ham, keyin ham shu yerga yotqiziladi.
Bu tajriba xirurglarning mas’uliyatini ikki karra oshiradi. Chunki jarroh operatsiyadan keyin bemorni reanimatolog-shifokorga topshirgach, uning keyingi ahvolidan bexabar qoladi. Endilikda har bir xirurg chaqaloqning tug‘ilishidan to operatsiyadan keyingi muolajalarigacha bo‘lgan jarayonlarni bevosita nazorat qilib boradi.
800-900 gramm chaqaloqda ham jarrohlik amaliyotlari o‘tkazilishi mumkin
— Erta tug‘uruqlarda ham jarrohlik amaliyotlari o‘tkazishga to‘g‘ri keladi. Hatto, bunday operatsiyalar tibbiy ko‘rsatmaga muvofiq, 800-900 grammlik chaqaloqlarda ham bajarilishi mumkin.
Muassasamizga Qozog‘iston va Tojikiston kabi qo‘shni davlatlardan ham bemorlar olib kelinadi. Shunday ekan imkoniyatlarimizni yanada kengaytirish zarur. Bu ko‘proq tibbiy texnologiya masalasiga borib taqaladi. Shunga qaramay, o‘tgan yili 2020-yilga nisbatan 7,8 foizdan ortiq bemor qamrab olindi.
