Nodirbek Abdusattorov jahon chempionlariga qarshi dona surdi
Shu kunlarda “Airthings Masters” musobaqasi bo‘lib o‘tmoqda.
Mukofot jamg‘armasi 150 ming AQSH dollarini tashkil etuvchi mazkur turnirda sayyoramizning eng kuchli grossmeysterlari qatnashmoqda. Ular orasida shaxmatning rapid yo‘nalishi bo‘yicha amaldagi jahon chempioni Nodirbek Abdusattorov ham ishtirok etmoqda.
Birinchi kunida Abdusattorov 4 ta partiyada raqiblarini mag‘lub etishga erishdi. Musoabaqaning amaldagi g‘olibi jahon tojdori Magnus Karlsen bu safar ham yosh grossmeysterimizni mag‘lub eta olmadi. Karlsenga qarshi qora donalarda harakat qilgan Nodirbek durang natija qayd etdi. Kecha Abdusattorov musobaqa doirasida yana 4 ta partiya o‘tkazdi. Shaxmatchimiz 5-turda jahon tojiga so‘nggi daʼvogar, rossiyalik Yan Nepomnyashiy bilan qora donalarda o‘ynadi va imkoniyatni boy berib qo‘ydi. Oltinchi turda ayollar o‘rtasida 12-jahon chempioni, rossiyalik Aleksandra Kostenyukni mag‘lubiyatga uchratdi. Yettinchi partiyada qora donalarda o‘ynadi va germaniyalik xalqaro grossmeyster Vinsent Keymerga yutqazib qo‘ydi. Sakkizinchi turda esa AQSH vakili Xans Niyemenndan ustun keldi.
Shu tariqa, Nodirbek Abdusattorov ikkinchi kungi bahslarda 2 g‘alaba va 2 mag‘lubiyat qayd etdi. Bugun hamyurtimiz 9-turda hindistonlik Pragnanandxa, 10-turda vetnamlik Liyem Kuang Le, 11-turda kanadalik Erik Xansen, 12-turda esa xitoylik Liren Ding bilan bahs olib boradi.
Maʼlumot uchun, 16 xalqaro grossmeyster ishtirokidagi musobaqa rapid yo‘nalishida o‘tkazilmoqda. Dastlab ishtirokchilar 15 turdan iborat saralash bosqichida o‘zaro kuch sinashadi. Shaxmatchilar to‘plagan har bir ochkosi uchun 250 dollardan mukofot olishadi.
Eslatib o‘tamiz, yaqinda Polshada o‘tkazilgan jahon chempionatida Nodirbek Abdusattorov Magnus Karlsenni mag‘lubiyatga uchratgan edi.
Avvalroq, shaxmat bo‘yicha top-100 talik reyting eʼlon qilingani va Nodirbek Abdusattorovga 2 xonali uy berilgani haqida xabar berilgandi.
Jamshidbek Amirov
