Samarqandda “Hizb ut-Tahrir” terroristik tashkilot tarafdorlari aniqlandi
Ular muntazam ravishda tashkilot g‘oyalari singdirilgan materiallarni internet tarmog‘i orqali tarqatib kelgan.
Davlat xavfsizlik xizmati Samarqand viloyati boshqarmasi viloyat IIB bilan hamkorlikda tezkor tadbir o‘tkazildi. Unga ko‘ra, Past Darg‘om tumanida yashovchi “A.O.” boshchiligidagi 8 nafar mahalliy fuqarolar ijtimoiy tarmoqlarda virtual xalqa tuzib, “Hizb ut-Tahrir” terroristik tashkiloti g‘oyalari bilan yo‘g‘rilgan materiallarni muntazam ravishda tarqatib, muhokama qilib kelganliklari aniqlandi.
Maʼlum bo‘lishicha, mazkur guruh yetakchisi “A.O.” Internet tarmog‘i orqali “Hizb ut-Tahrir” terroristik tashkiloti g‘oyaviy rahnomalaridan biri 1980 yilda tug'ilgan, Qirg‘iziston fuqarosi M.X. bilan aloqa bog‘lab, uning ko‘rsatmalari asosida faoliyat olib borayotgan bo‘lgan.
Hozirda ularga nisbatan jinoyat ishi qo‘zg‘atilib, tergov harakatlari olib borilmoqda.
Eslatib o‘tamiz, avvalroq “Hizb-ut Tahrir”ning o‘zbekistonlik yetakchisi qo‘lga olingani hamda Jizzax viloyatida "Hizb ut-Tahrir al-Islomi" xalqaro terrorchilik guruhi vakillari qo‘lga olingani haqida xabar berilgandi.
