Prezident 100 MVt quvvatli shamol elektr stansiyasi qurilishiga tamal toshi qo‘ydi
Tamal toshidagi kapsulada Prezident maktubi joylashtirilgan.
Qoraqalpog‘iston Respublikasi safarining ikkinchi kuni prezident Shavkat Mirziyoyev Beruniy tumanida quvvati 100 MVt bo‘lgan shamol elektr stansiyasi qurilishiga tamal toshini qo‘ydi. Bu haqda bloger Aziza Qurbonova xabar berdi.
"Tasavvur qilinglar farzandlarimiz, nevalarimiz bunday loyihadan qanday manfaat ko‘radi. Bu bir yillik emas, yillarga tatiydigan loyiha", — dedi Shavkat Mirziyoyev.
Prezident tamal toshiga solgan kapsula ichidagi maktubda shunday yozilgan: "...Elektr energiyasi bilan uzluksiz taʼminlash, shuningdek Qoraqalpog‘iston Respublikasining betakror ekomuhitini muhofaza qilish maqsadida 100 MVt quvvatli yangi shamol elektr stansiyasining qurilishini boshlash uchun keng Saudiya Arabistonining Acwa Power kompaniyasi bilan hamkorlikda Qoraqalpog‘iston Respublikasida boshlash uchun keng jamoatchilik bugun 2022 yil 24 fevral kuni tamal toshini qo‘yishga qaror qildik. Ushbu loyiha hududning ijtimoiy-iqtisodiy taraqqiyoti hamda aholi farovonligini taʼminlashda mustahkam asos bo‘lib xizmat qiladi. Shavkat Mirziyoyev — O‘zbekiston Respublikasi Prezidenti".
