Shavkat Mirziyoyev: "Dunyo kun sayin emas, soat sayin tahlikali bo‘lib bormoqda"
Prezident Beruniydagi shamol elektr stansiyasi qurilishiga tamal toshi qo‘yish marosimida nutq so‘zladi.
Davlat rahbari tumanda quriladigan quvvati 100 MVt bo‘lgan shamol elektr stansiyasi qurilishiga tamal toshini qo‘yish marosimida ishtirok etmoqda.
"Dunyo kun sayin emas, soat sayin tahlikali bo‘lib boryapti. Biz iqtisodiyotimiz, mudofaamizni mustahkam qilib, ishonch bilan jonajon vatanimizning qudratini ko‘tarishga harakat qilishimiz kerak", — deydi Prezident.
Shuningdek, davlat rahbari Qoraqalpog‘istonning iqlimi va bu yerning aholi turmush tarzi haqida gapirgan.
"Biz yerlardan unumli foydalana olmayapmiz. Qoraqalpog‘iston yeri 2 million xalqni bemalol boqa oladi. Nima qilish kerak? Aql va izlanish bilan, innovatsiya bilan undan foydalanish kerak. Qoraqalpog‘istonning havosi ham foyda berishi aniq. Necha yillar davomida bu yer energetika tanqisligini boshdan kechiryapti. Nega biz bunga ko‘p eʼtibor beryapmiz? Agar biz katta korxonalar qurmoqchi bo‘lsak, keladigan investor ham "infratuzilmang bormi, gazing, suving, yo‘ling, temiryo‘ling, aeroporting bormi deb so‘raydi. Korrupsiya bo‘lmaydimi, deb savol beradi.
Saudiya Arabistonining "ACWA Power" kompaniyasi 20ga yaqin yetakchi kompaniyalar o‘rtasida o‘tgan tanlovda 1 kilovatt soat elektr energiyasi uchun 2,57 AQSH senti tarif taklifi bilan g‘olib deb topilgan edi. Buyam adolat, raqobat", — deydi u.
Kompaniyasi 100 MVt quvvatli yangi shamol elektr stansiyasini quradi. Mazkur elektr stansiya 2 yil ichida, yaʼni 2024 yilda ishga tushiriladi.
Elektr stansiya ishga tushgach yiliga 350 million kilovatt-soat elektr energiyasi ishlab chiqarib, 120 mingdan ortiq xonadonni elektr energiyasi bilan taʼminlaydi, yiliga 106 million kub metr tabiiy gaz tejalishiga erishiladi, ushbu hajmdagi tejalgan gaz bilan 35 mingta xonadonni 1 yil davomida tabiiy gaz bilan taʼminlash mumkin.
