Farg‘onada ayol ikki nafar qizi bilan Katta Farg‘ona kanaliga cho‘kib ketgan
Qizlardan birining jasadi topilgan, ona va uning ikkinchi qizini qidirish ishlari davom etmoqda.
Farg‘ona viloyati Favqulodda vaziyatlar boshqarmasining maʼlum qilishicha, joriy yilning 21 fevral kuni Rishton tumani “Zohidon” mahalla fuqarolar yig‘ini Qo‘rg‘oncha ko‘chasida istiqomat qiluvchi N.G. ismli ayol va uning ikki nafar qizi yashash xonadonidan chiqib ketib, qaytmagan.
Shu kuni ayolning kichik qizi X.Sh.ning jasadi Katta Farg‘ona kanalining Bog‘dod tumani “Irg‘oli” mahalla fuqarolar yig‘ini hududidan oqib o‘tuvchi qismidan topilgan.
2022-yilning 22-fevral kunidan buyon Favqulodda vaziyatlar boshqarmasining maxsus vazifalarni bajaruvchi mintaqaviy qutqaruv otryadi g‘avvos-qutqaruvchilari tomonidan Katta Farg‘ona kanalida ona va bolani qidirish ishlari davom ettirilmoqda.
Qidiruv ishlari Katta Farg‘ona kanalining Rishton tumanidan O‘zbekiston tumanining Nursux qishlog‘igacha bo‘lgan qismida olib borilmoqda.
Eslatib o‘tamiz, avvalroq Katta Farg‘ona kanaliga tushib ketgan namanganlik 12 yoshli qizchaning jasadi qidirilayotgani haqida xabar berilgandi.
