Mart oyidagi yog‘ingarchilikda bodomning 15-18 foiz hosili yo‘qolgan – vazirlik
Sovuq urishi oqibatida qishloq xo‘jalik mahsulotlariga yetkazilgan zarar miqdori ochiqlandi.
Qishloq xo‘jaligi vazirligi mart oyidagi ko‘p yog‘in va sovuq urish hodisalarining mevali daraxtlar va qishloq xo‘jaligi mahsulotlariga keltirgan zararini ma’lum qildi.
Unga ko‘ra, Farg‘ona vodiy viloyatlarida o‘rik va bodomning erta pishar navlari 10 foizdan 23 foizgacha, gilosning ertapishar navi Namanganda 2,4 foizgacha zararlangan.
Janubiy viloyatlar, xususan, Qashqadaryo viloyatida ertapishar gilos va shaftolining 9 foizi, olxo‘ri va bodomning 15-18 foiz hosili yo‘qolgan.
Markaziy hududlarda o‘rik 7 foiz (Buxoro) dan 19 foiz (Navoiy)gacha, gilos, olxo‘ri va shaftoli mevalarida 3-8 foiz zararlanish holatlari kuzatilgani aniqlangan.
Vazirlikka ko‘ra, sovuq havo to‘lqinlari shimol hududlarda mevali daraxtlarga zarar keltirmagan. Shu bilan birga, sovuq va namgarchil oqimlar qishloq xo‘jalik yo‘nalishida uzum hamda kartoshka kabi sabzavot turlariga zarar keltirmagan.
Bu yilgi namgarchil havodan asosan o‘rik zararlangan. Zararlanish 20 foizgacha. O‘tgan yili o‘rik daraxti hosili anomal sovuqlardan markaziy va janubiy viloyatlarda 80 foizgacha yo‘qotilgan edi.
