Chilonzorda Nexia-3 daraxtga urildi: uch kishi halok bo‘ldi
YTHga avtomobil rul boshqaruvida yuzaga kelgan texnik nosozlik sabab bo‘lgan.

Toshkent shahrining Chilonzor tumanida 16-noyabr kuni sodir bo‘lgan yo‘l-transport hodisasi oqibatida haydovchi va ikki nafar yo‘lovchi vafot etdi.
Toshkent shahar IIBB YHXB ma’lumotiga ko‘ra, hodisa soat 04:50 larda Bunyodkor shox ko‘chasida, Uztelekom binosi qarshisida yuz bergan. 2008-yilda tug‘ilgan T.A. Nexia-3 rusumli avtomobilni boshqarayotib, rul boshqaruvini yo‘qotgan va yo‘l chetidagi daraxtga urilgan.
Dastlabki ma’lumotlarga ko‘ra, YTHga avtomobil rul boshqaruvida yuzaga kelgan texnik nosozlik sabab bo‘lgan. Hodisa oqibatida haydovchi va uning ikki nafar yo‘lovchisi shifoxonada vafot etgan.
Mazkur holat yuzasidan O‘zbekiston Respublikasi Jinoyat kodeksining 266-moddasi tegishli qismi bilan jinoyat ishi qo‘zg‘atilgan. Hozirda Toshkent shahar IIBB Tergov boshqarmasi tomonidan dastlabki tergov harakatlari olib borilmoqda.








