AQSh Yaqin Sharqqa yana bir aviatashuvchi kemasini yubordi: Arabiston dengizida 3 ta aviatashuvchi jamlandi
Mintaqadagi harbiy-dengiz kuchlari tarkibiga 13 ta esmines va ikkita kreyser ham kiradi.

AQSh Harbiy-dengiz kuchlarining uchinchi aviatashuvchi kemasi USS Theodore Roosevelt Yaqin Sharqqa yetib keldi. Bu haqda Associated Press (AP) agentligi AQSh rasmiylariga tayanib xabar berdi.
Maxfiy harbiy amaliyotlar haqida ma’lumot berish vakolatiga ega bo‘lmagani sababli ismini oshkor qilmagan AQSh rasmiysi kemaning mintaqaga kelganini tasdiqlagan.
USS Theodore Roosevelt sentabr oyida unga hamrohlik qiluvchi zarba guruhi bilan San-Diegodan yo‘lga chiqqan edi. Kema Yaqin Sharqda joylashgan USS George H.W. Bush va USS George Washington aviatashuvchi kemalariga qo‘shildi. Uning kelishi mintaqaga minglab qo‘shimcha harbiy xizmatchilarni olib keldi.
AP ma’lumotiga ko‘ra, USS George H.W. Bush aprel oyida, USS George Washington esa avgust oyida mintaqaga yetib kelgan. AQSh Harbiy-dengiz kuchlari bundan avval 2003-yildan beri ilk bor aprel oyida Yaqin Sharqda bir vaqtning o‘zida uchta aviatashuvchi zarba guruhini joylashtirgan edi.
AQSh Harbiy-dengiz kuchlari ma’lumotlariga ko‘ra, hozir Arabiston dengizida uchta aviatashuvchi kema, 13 ta esmines, ikkita kreyser va bitta qirg‘oqbo‘yi jangovar kemasi mavjud. Ushbu flot Eron kemalariga nisbatan dengiz blokadasini ta’minlashda ishtirok etmoqda.
AQSh harbiy kuchlarining mintaqada to‘planishi prezident Donald Tramp Eron bilan urushdagi keyingi qadamlarni ko‘rib chiqayotgan bir paytda yuz bermoqda. U avvalroq Eronga keng ko‘lamli qo‘shimcha zarbalar berish bilan tahdid qilgan, shu bilan birga sakkiz oydan ortiq davom etayotgan urush «harbiy jihatdan amalda yakunlanganini» bildirgan.








