Xotin-qizlarning jamiyatdagi rolini oshirish bo‘yicha Milliy dastur tasdiqlandi
15 aprel kuni gender tenglikni va oila masalalari bo‘yicha Respublika komissiyasi birinchi majlisi bo‘lib o‘tdi
2022 yilning 15 aprel kuni Xotin-qizlarning jamiyatdagi rolini oshirish, gender tenglik va oila masalalari bo‘yicha respublika komissiyasining birinchi majlisi bo‘lib o‘tdi.
Majlisda Komissiya aʼzolari, vazirlik va idoralar hamda ommaviy axborot vositalari vakillari ishtirok etdi.
Majlisda O‘zbekistonda gender tenglikni taʼminlash yuzasidan amalga oshirilgan ishlarni jadallashtirish maqsadida 2022 – 2026 yillarda xotin-qizlarning mamlakat iqtisodiy, siyosiy va ijtimoiy hayotining barcha jabhalarida faolligini oshirish bo‘yicha Milliy dastur tasdiqlandi.
Shuningdek, Xotin-qizlarning jamiyatdagi rolini oshirish, gender tenglik va oila masalalari bo‘yicha respublika komissiyasi tuzildi. Ushbu komissiya tuzilishidan maqsad – ushbu yo‘nalishda yagona yondashuv asosida vazirlik va idoralar faoliyatini samarali tashkil etish va muvofiqlashtirish. Komissiya asosiy vazifalari qatorida xotin-qizlarning huquq va qonuniy manfaatlarini taʼminlash, gender tenglik va oilani qo‘llab-quvvatlash bo‘yicha qonunchilik hujjatlari ijrosi ustidan tizimli nazoratni amalga oshiradi hamda monitoringini olib boradi.
Gender tenglikni taʼminlashning quyi tizimgacha yo‘lga qo‘yish maqsadida mahalliy Kengashlarda hududiy komissiyalar tashkil etilishi belgilandi.
Shu bilan birga, Komissiya Milliy dastur va uni amalga oshirishga qaratilgan kompleks chora-tadbirlar rejasida belgilangan vazifalar ijrosini taʼminlashda tegishli vazirlik va idoralarga, hududlarga ko‘maklashadi va qatʼiy nazorat o‘rnatadi.
Majlisda, shuningdek, davlat boshqaruvida xotin-qizlar faolligini oshirish bo‘yicha ishlab chiqilgan dastur loyihasi ham muhokama etildi.
Qayd etish kerakki, bugungi kunda davlat boshqaruvida xotin-qizlar ulushi 27 foizni tashkil etmoqda. Rahbarlik lavozimlarida ishlayotgan xotin-qizlar ulushi esa 10 foizga ham yetmaydi.
Bu borada rahbar xotin-qizlarni tayyorlash bo‘yicha “Rahbar ayollar maktabi” o‘quv dasturi ishlab chiqildi. Endilikda mazkur dastur asosida har yili kamida 100 nafar xotin-qiz Davlat boshqaruvi akademiyasida o‘qitiladi.
Komissiya majlisida 2022–2026 yillarda xotin-qizlarning mamlakat iqtisodiy, siyosiy va ijtimoiy hayotining barcha jabhalarida faolligini oshirish bo‘yicha Milliy dastur ijrosiga ham eʼtibor qaratildi. Dasturda ijro muddati kelgan bandlar bo‘yicha masʼul vazirlik va idora rahbarlarining axborotlari eshitildi.
