Endi uy-joyni “snos”ga tushganini oldindan bilish mumkin
"Qurilish sohasiga oid yagona maʼmuriy qurilish reglamentlarini tasdiqlash to‘g‘risida" hukumat qarori qabul qilindi.
O‘zbekistonda uy-joyning “snos”ga tushganini aniqlash bo‘yicha davlat xizmatlari ko‘rsatiladi. Maʼlumotnoma 3 ish kunida rasmiylashtiriladi hamda ariza beruvchining elektron manziliga yuborilib, unga bu haqida xabar beriladi.
Qarorga ko‘ra, quyidagilar bo‘yicha davlat xizmatlari ko‘rsatishning maʼmuriy reglamentlari tasdiqlangan:
— bino va inshootlarning tashqi ko‘rinishini o‘zgartirishni kelishish;
— bino va inshootlarning ixtisoslashishini o‘zgartirish, qayta qurish, rekonstruksiya qilish hamda o‘z hududida qo‘shimcha bino va inshootlarni qurishni loyihalashtirishga ruxsatnoma berish;
— arxitektura-rejalashtirish topshirig‘ini ishlab chiqish;
— loyiha-smeta hujjatlarini kelishish;
— qurilish-montaj ishlarini boshlash uchun obyektni ro‘yxatdan o‘tkazish;
— qurilish-montaj ishlari tugallangan obyektdan foydalanish uchun ruxsatnoma berish;
— ko‘chmas mulk buzilishga tushgan yoki tushmaganligi to‘g‘risida maʼlumotnoma berish.
Shunga muvofiq, jumladan, bino va turar joylarning buzilishga tushganlik holati haqida maʼlumotnoma olish uchun DXM yoki YAIDXPga murojaat qilinadi. Maʼlumotnoma olish uchun arizalar YAIDXP orqali dam olish va bayram kunlaridan qatʼi nazar, 24 soat davomida yuborilishi mumkin.
