Andijonda “Lacetti” haydovchisi yo‘l chetida qulupnay sotayotgan fuqaroni urib yubordi
Hodisa oqibatida sotuvchi shifoxonaga yuborilgan.
29-aprel kuni soat 14.00 atrofida Oltinko‘l tumani hududidan o‘tgan avtomobil yo‘lida “Lacetti” rusumli avtomashina ishtirokida yo‘l-transport hodisasi sodir bo‘lgan. Holat yuzasidan IIV rasmiy telegram kanalida videolavha e’lon qilindi.
Ma’lum bo‘lishicha, 1972-yilda tug‘ilgan “Lacetti” haydovchisi boshqaruvni yo‘qotib, yo‘l chetida qulupnay sotib turgan fuqaroni urib ketgan. Hodisa oqibatida sotuvchi og‘ir turdagi tan jarohati olib, hushsiz holatda shifoxonaga yuborilgan.
“Yo‘l harakati ishtirokchilariga xalaqit bermaslik uchun fuqarolardan belgilanmagan joylarda savdo-sotiq ishlari bilan shug‘ullanmasligini so‘rab qolamiz”, — deyiladi xabarda.
Eslatib o‘tamiz, avvalroq Andijon tumanida 16 yoshli fuqaro boshqaruvidagi “Matiz” avtohalokatga uchragandi. Oqibatda haydovchining 13 yoshli ukasi og‘ir tan jarohati olib, shifoxonada vafot etgan.
