Toshkentda 4 ta avtomobil to‘qnashuvi sodir bo‘ldi
Hodisa oqibatida mashinalardan biri ag‘darilgan.
Bugun, 2-may kuni Toshkent shahrining Shayxonohur tumanida 4 ta avtomobil ishtirokida yo‘l-transport hodisasi sodir bo‘ldi. Bu haqda IIV Jamoat xavfsizligi departamenti yo‘l harakati xavfsizligi xizmati xabar berdi.
Qayd etilishicha, voqea soat 14.30 atrofida tumanning “Mannon Uyg‘ur” ko‘chasida ro‘y bergan. Unda “Lasetti”, “Neksiya–3” va ikkita “Matiz” rusumli avtomashinalar o‘zaro to‘qnashib ketgan. Oqibatda 1980-yilda tug‘ilgan fuqaro boshqaruvidagi “Matiz” astomobili ag‘darilib ketgan.
Hodisada hech kim tan jarohati olmagan. Hozirda mazkur holat yuzasidan surishtiruv harakatlari olib borilmoqda.
Eslatib o‘tamiz, avvalroq Andijonda 5 ta avtomobil to‘qnashuvi sodir bo‘lgandi. Hodisa oqibatida haydovchilardan biri shifoxonaga yotqizilgan.
