O‘zbekistondagi xususiy tibbiyot muassasalari soni 7 ming 300 dan oshdi

Mamlakatdagi xususiy tibbiyot muassasalari soni 7 ming 320 taga yetdi. Bu haqda Sog‘liqni saqlash vazirligi matbuot xizmati xabar berdi.
Vazirlik xabarida ushbu muassasalarning 50 tasi xorijiy mamlakatlar bilan hamkorlikda ochilgani qayd etilgan. 
Hozirda mazkur tarmoqda faoliyat yuritgan shifokorlar soni 16 ming 300 nafardan, o‘rta tibbiyot xodimlari soni esa 24 ming 840 nafardan ziyodni tashkil etib, xususiy  shifoxonalarning 5 ming 823 tasi ambulator, 1 ming 497 tasi esa statsionar sharoitida ish olib bormoqda. Eng ko‘p xususiy tibbiyot muassasalari Toshkent shahri (1 ming 628 ta), Andijon (726 ta) va Toshkent viloyatlarida (644 ta) joylashgan.
Taʼkidlanishicha, statsionar shaklda faoliyat olib borayotgan xususiy shifoxonalarda sanatoriylar bilan qo‘shib hisoblaganda 42 mingdan ortiq koyka mavjud. Eng ko‘p o‘rin-joylar quyidagi hududlar kesimiga to‘g‘ri kelgan:

Andijon viloyati — 6 ming 348 ta;
Namangan viloyati — 5 ming 880 ta;
Qashqadaryo viloyati — 4 ming 602 ta.