Toshkentda dahshatli avtohalokat yuz berdi
Spark haydovchisi tezlikni oshirib, beton to‘siqqa urilishi oqibatida 2 kishi halok bo‘lgan.
Bugun, 12 may kuni Toshkent shahrida Spark rusumli avtomobil ishtirokida yo‘l-transport hodisasi sodir bo‘ldi. Bu haqda shahar IIB axborot xizmati xabar berdi.
Qayd etilishicha, tungi soat 03.00 larda Chilonzor tumani Bunyodkor shohko‘chasida 1999 yilda tug‘ilgan U.M. “Spark” rusumli avtomobilni ishonchnoma asosida boshqarib, tezlikni oshirishi oqibatida rul boshqaruvini yo‘qotgan va yo‘lni ajratib turuvchi qismidagi beton ustunga urilgan.
YTH oqibatida avtomobil haydovchisi olgan tan jarohatlari bilan voqea joyida vafot etgan. Avtomobilda bo‘lgan yo‘lovchi K.Sh. shifoxonaga olib borilgan, biroq shifokorlarning sa’y-harakatlariga qaramasdan vafot etgan.
Hozirda mazkur holat yuzasidan Toshkent shahar IIBB Tergov boshqarmasi tomonidan O‘zbekiston Respublikasi Jinoyat kodeksining 266-moddasi 3-qismi bilan jinoyat ishi qo‘zg‘atilgan.
