O‘zbek–qirg‘iz chegarasida 9 kishi vafot etdi
Holat yuzasidan IIV ma’lumot berdi.
O‘zbek–qirg‘iz chegarasida 12 ta avtomobil ishtirokida yo‘l-tansport hodisasi sodir bo‘ldi. Bu haqda IIV axborot xizmati xabar berdi.
Qayd etilishicha, voqea bugun, 21 may kuni soat 15.30 atrofida “Chashma” chegara o‘tkazish punktida yuz bergan. Qirg‘iz Respublikasi Batken viloyati Qadamjoy tumani orqali O‘zbekiston Respublikasining So‘x tumani hududiga harakatlanib kelayotgan, ustiga buldozer yuklangan bo‘lgan treyler avtotransportining tormoz uskunasi ishdan chiqib, haydovchisi boshqaruvni yo‘qotgan va ro‘yxatdan o‘tish uchun navbatda turgan jami 12 ta (2 ta O‘zbekiston va 10 ta Qirg‘iz Respublikasi) avtomashinalarga urilib, ularga shikast yetkazgan.
Hodisa oqibatida 9 nafar fuqaro (shulardan, 1 nafari O‘zbekiston Respublikasi, qolgan 8 nafari Qirg‘iz Respublikasi fuqarosi) vafot etgan.
Hozirda holat yuzasidan tergovga qadar surishtiruv ishlari olib borilmoqda.
