Toshkentda Matiz daraxtga urilishi oqibatida 2 kishi halok bo‘ldi
Hodisaga haydovchining tezlikni oshirgani sabab bo‘lgan.
Toshkent shahrining Yakkasaroy tumanida 7 iyun kuni Matiz ishtirokida yo‘l-transport hodisasi sodir bo‘ldi. Holat yuzasidan shahar IIBB ma’lumot berdi.
Qayd etilishicha, avtohalokat shu kuni soat 04:00 atrofida Yakkasaroy tumani Bobur va Shota Rustaveli ko‘chalari kesishmasida yuz bergan. 1989 yilga tug‘ilgan haydovchi B. A. Matiz rusumli avtomashinada harakatlanib, tezlik oqibatida rul boshqaruvini yo‘qotgan va transport vositasi yo‘l chetidagi daraxtga urilgan.
Hodisadan so‘ng avtomashina haydovchisi va uning yo‘lovchisi (2000 yilda tug‘ilgan fuqaro) Z. K. tan jarohatlari olib, voqea joyida vafot etgan.
Mazkur holat yuzasidan Toshkent shahar IIBB Tergov boshqarmasi tomonidan O‘zbekiston Respublikasi Jinoyat kodeksining 266-moddasi 3-qismi bilan jinoyat ishi qo‘zg‘atildi.
