Jismoniy tarbiya va sport bo‘yicha malaka oshirish instituti tashkil etiladi
Institut xalqaro aloqalarni kengaytirish va mustahkamlashni maqsad qilgan.
Vazirlar Mahkamasining “Jismoniy tarbiya va sport bo‘yicha mutaxassislarni qayta tayyorlash va malakasini oshirish tizimini yana-da takomillashtirish chora-tadbirlari to‘g‘risida”gi qaroriga ko‘ra, Jismoniy tarbiya va spot bo‘yicha mutaxassislarni ilmiy-metodik taʼminlash, qayta tayyorlash va malakasini oshirish markazi Jismoniy tarbiya va sport bo‘yicha mutaxassislarni qayta tayyorlash va malakasini oshirish institutiga aylantiriladi.
Institutning vazifalari quyidagilardan iborat:
– maktabgacha taʼlim tashkilotlarining jismoniy tarbiya instruktorlari, umumiy o‘rta va o‘rta maxsus taʼlim, professional taʼlim muassasalarining jismoniy tarbiya fani o‘qituvchilari, oliy taʼlim muassasalarining jismoniy tarbiya va sport yo‘nalishlari bo‘yicha rahbar va pedagog kadrlari, olimpiya va paralimpiya zaxiralari kollejlari, sport turlari bo‘yicha ixtisoslashtirilgan davlat maktab-internatlari, sport maktablarining rahbar kadrlari, instruktor-metodistlari, maxsus fan o‘qituvchilari, trenerlari, sport psixologlari, maxsus xizmat xodimlari hamda sport tashkilotlarining jismoniy tarbiya va sport bo‘yicha mutaxassislarini qayta tayyorlaydi va malakasini oshiradi;
– mehnat bozori ehtiyojlarini hisobga olgan holda, kasbiy maʼlumotga ega bo‘lmagan sport taʼlim muassasalari xodimlari uchun qo‘shimcha ixtisoslik bo‘yicha pulli asosda qayta tayyorlash va malaka oshirish kurslarini tashkil etadi;
– jismoniy tarbiya va sport taʼlim tizimida ilg‘or pedagogik texnologiyalarni joriy etadi;
– o‘quv-mashg‘ulot jarayoniga, xususan sport taʼlim muassasalari amaliyotiga zamonaviy innovatsion pedagogik texnologiyalarni, o‘qitishning samarali shakllari va usullarini joriy etadi;
– sport taʼlim muassasalari faoliyati samaradorligini oshirish, o‘z filiallari faoliyatini muvofiqlashtiradi hamda ilmiy-metodik ishlarni tashkil etadi;
– xalqaro aloqalarni kengaytiradi va mustahkamlaydi, konferensiyalar, ko‘rgazmalar va boshqa tadbirlar o‘tkazish orqali jismoniy tarbiya va sport sohasida mamlakatimiz yutuqlarini xalqaro darajada keng yoritadi, xorijiy taʼlim muassasalari bilan yaqin hamkorlikni yo‘lga qo‘yadi.
