BMT Shavkat Mirziyoyevning tashabbusini qo‘llab-quvvatladi
Tashkilotga aʼzo barcha davlatlar Markaziy va Janubiy Osiyo o‘rtasidagi o‘zaro bog‘liqlikni mustahkamlash to‘g‘risidagi maxsus rezolyutsiyani bir ovozdan maʼqulladi.
BMT Bosh Assambleyasi O‘zbekiston Prezidenti Shavkat Mirziyoyevning navbatdagi muhim tashabbusini qo‘llab-quvvatladi. Tashkilotga aʼzo barcha davlatlar O‘zbekiston tomonidan 40 ta mamlakat hammuallifligida ishlab chiqilgan Markaziy va Janubiy Osiyo o‘rtasidagi o‘zaro bog‘liqlikni mustahkamlash to‘g‘risidagi maxsus rezolyutsiyani bir ovozdan maʼqulladi.
Ushbu rezolyutsiyani ishlab chiqish va unda ikki mintaqa muloqotining umumiy yondashuvlari, asosiy prinsiplari va yo‘nalishlarini mustahkamlab qo‘yish tashabbusi davlatimiz rahbari tomonidan 2021 yil iyul oyida o‘tkazilgan «Markaziy va Janubiy Osiyo: mintaqaviy o‘zaro bog‘liqlik. Tahdidlar va imkoniyatlar» mavzusidagi Toshkent konferensiyasida ilgari surilgan edi.
Shuningdek, hujjatda Prezidentimizning 2022-yilni Iqtisodiy hamkorlik tashkiloti doirasida "O‘zaro bog‘liqlikni mustahkamlash yili" deb eʼlon qilish taklifi yuqori baholangan.
