Qamchiq dovonida yuk mashinasi Damasga urilishi oqibatida yong‘in kelib chiqdi
Hodisa oqibatida vafot etganlar bor.
Bugun, 21-iyul kuni Kamchiq dovonida 2 ta avtomashina ishtirokida yo‘l-transport hodisasi sodir bo‘lib, yong‘in kelib chiqdi. Holat yuzasidan Namangan viloyati Ichki ishlar boshqarmasi axborot xizmati dastlabki ma’lumotlarni e’lon qildi.
Ma’lum qilinishicha, hodisa soat 00:05 atrofida A-373 Toshkent–O‘sh avtomobil yo‘lining 222-kilometrida yuz bergan. Vodiy–Toshkent yo‘nalishi bo‘ylab harakatlanib borayotgan “MAN” rusumli (davlat raqami 40 Q 486 XA) yonilg‘i tashuvchi yuk mashinasi qarama-qarshi yo‘nalishga o‘tib ketib, “Damas” (davlat raqami 40 Q 943 WA) rusumli transport vositasiga borib urilgan. To‘qnashuv oqibatida yong‘in kelib chiqqan va transport vositalari yonib zararlangan. Shuningdek, voqea joyida bo‘lgan “Nexia” avtomashinasiga ham texnik shikast yetgan.
Hodisa oqibatida vafot etganlar bor. Hozirda yong‘in asoratlarini bartaraf etish bo‘yicha ishlar olib borilmoqda.
Eslatib o‘tamiz, bundan oldin Qamchiq dovonida paxta tolasini ortib ketayotgan yuk mashinasida yong‘in chiqqandi.
Javohirbek TURSUNOV
