Shavkat Mirziyoyev Eron Prezidentiga hamdardlik bildirdi
Avvalroq Eronda kuchli suv toshqinlari kuzatilib, odamlar halok bo‘lgandi.
O‘zbekiston Prezidenti Shavkat Mirziyoyev Eronning qator hududlarida yuz bergan kuchli suv toshqinlari oqibatida ko‘plab insonlar qurbon bo‘lgani va katta talafotlar yetkazilgani munosabati bilan Prezident Ibrohim Raisiyga hamdardlik bildirdi. Bu haqda Prezident matbuot kotibi Sherzod Asadov ma’lum qildi.
Xabarda aytilishicha, Davlat rahbari vafot etganlarning oila a’zolari va yaqinlariga taskin-tasalli so‘zlarini yetkazishni so‘ragan. Shuningdek, jarohatlanganlar tez fursatda sog‘ayib ketishini tilagan.
