O‘zbekiston — Ozarbayjon — Turkiya muloqot formatining 1-yig‘ilishi boshlandi
Toshkentda bo‘lib o‘tayotgan tadbirda uch mamlakatning tashqi siyosat, savdo, iqtisodiyot va transport masalalari uchun masʼul bo‘lgan vazirliklari rahbarlari ishtirok etmoqda.
Bugun O‘zbekiston Respublikasi tashqi ishlar vaziri v.b. Vladimir Norov “O‘zbekiston-Ozarbayjon-Turkiya” muloqot formatining birinchi yig‘ilishida ishtirok etish uchun mamlakatimizga kelgan Turkiya Respublikasi tashqi ishlar vaziri Mevlut Chavushog‘lu bilan uchrashdi. Toshkent shahrida "O‘zbekiston – Ozarbayjon – Turkiya" muloqot formatining birinchi yig‘ilishi o‘z ishini boshladi.
O‘zbekiston Respublikasi tashqi ishlar vaziri v.b. Vladimir Norov "O‘zbekiston – Ozarbayjon – Turkiya" formatidagi uch tomonlama uchrashuvini ochiq deb eʼlon qildi.
"O‘zbekiston – Ozarbayjon - Turkiya" muloqotining taʼsis etilishu xalqaro munosabatlar va global iqtisodiyotda ro‘y berayotgan tez o‘zgaruvchan va mavhum jarayonlarni hisobga olgan holda har qachongidan ham dolzarbdir. Uch mamlakat rahbarlari o‘rtasida o‘rnatilgan mazmunli muloqot, yuqori darajadagi ishonch va o‘zaro tushunish o‘zaro hurmat va qo‘llab-quvvatlash tamoyillariga asoslangan munosabatlarni rivojlantirishga kuchli turtki bermoqda. Umumiy saʼy-harakatlarimiz samarasi o‘laroq faqat so‘nggi besh yil ichida O‘zbekiston va Ozarbayjon o‘rtasidagi tovar aylanmasi qariyb yetti baravar, Turkiya bilan esa ikki yarim baravar ko‘paydi.
Ushbu ijobiy tendensiya, albatta, bu yil ham davom etadi.
Joriy yil 26 iyul kuni Toshkent shahrida "Afg‘oniston: xavfsizlik va iqtisodiy rivojlanish" mavzusida xalqaro konferensiya o‘tkazildi. Unda Afg‘oniston muvaqqat hukumatining yuqori martabali delegatsiyasi ham ishtirok etdi.
“Tolibon” harakati vakillari "Termiz – Mozori-Sharif – Kobul – Peshovar" temir yo‘lini qurish loyihasini amalga oshirish Afg‘onistonni tiklash uchun muhim strategik ahamiyatga ega ekanligini eʼtirof etdilar.
Termiz – Mozori-Sharif – Kobul – Peshovar" temir yo‘lini loyihasining amalga oshirilishi Markaziy Osiyo orqali eng yirik subregionlar o‘rtasida yuklarni tashish muddati va narxini sezilarli darajada kamaytiradi hamda mamlakatlarimizga umumiy aholisi 1,9 milliard va yalpi ichki mahsuloti $3,5 trillion bo‘lgan Janubiy Osiyoning istiqbolli bozorlariga to‘g‘ridan-to‘g‘ri kirish uchun noyob imkoniyat yaratadi" - deydi Norov.
