Ziroat Mirziyoyeva “Nol chiqindi” Global alyansini tashkil etishga bag‘ishlangan uchrashuvda ishtirok etdi
O‘zbekiston Birinchi xonimi alyans doirasida ekologik ta’limni rivojlantirish va yoshlarning ekologik loyihalarini qo‘llab-quvvatlash tashabbuslarini ilgari surdi.
O‘zbekiston Respublikasi Prezidenti Shavkat Mirziyoyevning COP31 tadbirlarida ishtirok etish uchun Turkiyaga tashrifi doirasida Birinchi xonim Ziroat Mirziyoyeva Antaliya shahrida bo‘lib o‘tgan yuqori darajadagi uchrashuvda qatnashdi.
Tadbirda “Nol chiqindi” (Zero Waste) Global alyansi tashkil etilgani e’lon qilindi. Mazkur tashabbus davlat va hukumat rahbarlarining turmush o‘rtoqlari sa’y-harakatlarini birlashtirish, tabiiy resurslardan oqilona foydalanish hamda chiqindilarni kamaytirish tamoyillarini xalqaro miqyosda ilgari surishga qaratilgan.
Uchrashuvda so‘zga chiqqan Ziroat Mirziyoyeva taklif va samimiy mehmondo‘stlik uchun Turkiya Birinchi xonimi Emine Erdog‘anga minnatdorlik bildirdi. Shuningdek, uning “Nol chiqindi” tashabbusini xalqaro miqyosda ilgari surishga qo‘shayotgan shaxsiy hissasini alohida e’tirof etdi.
O‘zbekiston Birinchi xonimi Global alyans tashkil etilishini qo‘llab-quvvatlab, uning doirasida ekologik ta’limni rivojlantirish, yoshlar tomonidan ilgari surilayotgan ekologik loyihalarni qo‘llab-quvvatlash va ularni amaliyotga tatbiq etishga qaratilgan qator tashabbuslarni ilgari surdi.
