Oliy sud raisi endi sudya bo‘lishi mumkin
Prezident Kozim Komilov nomzodini Konstitutsiyaviy sud sudyasi vakant lavozimiga taklif etdi.
Prezident O‘zbekiston Konstitutsiyaviy sudining vakolatlari 24 avgust kuni tugayotgan 6 nafar sudyasining o‘rniga nomzodlar yuzasidan Oliy Majlis Senatiga taqdimnomalar kiritdi.
Ushbu nomzodlar:
- Balkibayeva Janagul Ismaylovna;
- Gafurov Askarjon Boyisovich;
- Davletova Karomatjon Xudaybergenovna;
- Ismaylov Raxat Aminbayevich;
- Raximov Abdumannob Kuziyevich;
- Raxmanov Akmal Ergashevich.
Ular Senat tomonidan saylangan taqdirda, o‘z vakolatlariga 24 avgust kunidan boshlab kirishadi.
Prezident o‘z taqdimnomasi bilan Konstitutsiyaviy sud sudyasi vakant lavozimiga O‘zbekiston Oliy sudi raisi lavozimini egallab kelgan Kozim Komilovning nomzodini taklif etdi.
Shuningdek, davlat rahbari o‘z taqdimnomasi bilan Prezidentning huquqni muhofaza qiluvchi va nazorat organlari faoliyatini muvofiqlashtirish masalalari bo‘yicha maslahatchisi Baxtiyor Islamovning nomzodini O‘zbekiston Oliy sudi raisi lavozimiga ko‘rib chiqish uchun Senatga kiritdi.
Kozim Komilov ikki oy avval Oliy sud raisi lavozimiga qayta saylangandi. U qayta lavozimga tayinlanganida hamkasblari qarshisida harbiy kiyimda kirib kelgan va bu chiqishini yangi rejalari bilan bog‘lagan.
«Harbiycha kiyimda chiqishimning o‘z maʼnosi bor. Oldingidek ish ketmaydi, endi sizlar bilan harbiychasiga ishlaymiz», — degani aytilgandi.
