Test natijalari bo‘yicha apellatsiya arizalarini qabul qilish boshlandi
Shikoyatlar 10 kun ichida qabul qilinadi.
Oliy ta’lim muassasalarining bakalavriat ta’lim yo‘nalishlariga kirish test sinovlari natijasidan norozi bo‘lgan abituriyentlardan apellatsiya arizalarini qabul qilish boshlandi, deya xabar bermoqda Davlat test markazi axborot xizmati.
Apellatsiya arizalari my.dtm.uz sayti orqali (abituriyentning shaxsiy kabinetida) onlayn tarzda qabul qilinmoqda va 6-sentyabrga qadar (10 kun) davom etadi.
Abituriyent apellatsiya shikoyati berishi uchun test sinovida ishtirok etgan va test sinovidan chetlatilmagan bo‘lishi lozim. Apellatsiya arizasini bergan abituriyentga uni ko‘rib chiqish sanasi va vaqti ko‘rsatilgan xabarnoma beriladi.
Abituriyent xabarnomada belgilangan vaqtda shaxsini tasdiqlovchi hujjat, xabarnoma va abituriyent ruxsatnomasi bilan Davlat test markaziga kelishi kerak. Apellatsiya shikoyatlarini ko‘rib chiqish 2022-yil 7-sentyabrdan boshlanadi.
