Shavkat Mirziyoyev AQSH elchisini qabul qildi
Uchrashuvda amerikalik diplomat mamlakatlar o‘rtasidagi hamkorlikni faol qo‘llab-quvvatlashda davom etishini bildirdi.
Bugun, 7-sentabr kuni Prezident Shavkat Mirziyoyev O‘zbekistondagi diplomatik missiyasini yakunlayotgan Amerika Qo‘shma Shtatlari Favqulodda va Muxtor elchisi Deniyel Rozenblyumni qabul qildi. Bu haqda Prezident matbuot xizmati xabar qilmloqda.
Davlat rahbari Deniyel Rozenblyumning O‘zbekiston-AQSH strategik sheriklik munosabatlarini rivojlantirishdagi hissasini qayd etdi.
Keyingi yillarda konstruktiv siyosiy muloqot yo‘lga qo‘yildi. Birgalikdagi sa’y-harakatlar bilan o‘zaro manfaatli savdo-iqtisodiy hamkorlik kengayib bormoqda. O‘zaro savdo hajmi oshmoqda, AQSHning yetakchi kompaniyalari ishtirokida qator investisiya loyihalari amalga oshirilmoqda. Ta’lim va sog‘liqni saqlash sohalarida ikki tomonlama dasturlar joriy etilmoqda.
O‘zbekiston Respublikasi Prezidentining joriy yil avgust oyida qabul qilingan farmoniga muvofiq amerikalik diplomat O‘zbekistonning yuksak davlat mukofoti – “Do‘stlik” ordeniga sazovor bo‘ldi.
AQSH elchisi uning faoliyatiga berilgan yuqori baho uchun samimiy minnatdorlik bildirib, bundan buyon ham mamlakatlar o‘rtasidagi ko‘p qirrali hamkorlikning mustahkamlanishini faol qo‘llab-quvvatlashda davom etishini ta’kidladi.
