SamDU rektori Osiyo universitetlari assotsiatsiyasi prezidenti bo‘ldi
O‘zbekiston Respublikasi fan arbobi Rustam Xolmurodov Assotsiatsiyaga ikki yil prezidentlik qiladi.
"Oltoy – Osiyo" V xalqaro ta’lim forumi doirasida Rossiyada Osiyo universitetlari assotsiatsiyasining Kongressi o‘tkazildi. Unda 8 ta davlatdan 72 ta universitetning rektor va prorektorlari, jami 112 nafar delegat ishtirok etdi.
Ushbu forumda Samarqand davlat universiteti rektori, O‘zbekiston Respublikasi fan arbobi Rustam Xolmurodov onlayn tarzda ishtirok etdi.
Uchrashuvda 2020-2022-yillardagi ishlarni sarhisob qilish, assotsiatsiyaning yangi a’zolarini qabul qilish, tasdiqlash, Osiyo universitetlari assosiasiyasi prezidenti va vitse-prezidentlarini saylash kabi masalalar ko‘rib chiqildi.
So'nggi qaror bilan Samarqand davlat universiteti rektori Osiyo universitetlari assotsiatsiyasining yangi prezidenti etib saylandi. Assotsiatsiyaga prezidentlik lavozimining muddati ikki yil bo‘lib, 2022-2024 yillarni o‘z ichiga oladi.
Osiyo universitetlari assotsiatsiyasining Kongressida, O‘zbekiston, Xitoy, Rossiya, Qozog‘iston, Qirg‘iziston, Mo‘g‘uliston, Tojikiston va Armanistondan delegatlar ishtirok etdi.
