O‘zbekiston Respublikasi xalqaro investitsiyaviy arbitraj ishida g‘alaba qozondi
Ushbu investitsiyaviy nizo 2021-yil iyun oyida boshlanib, 5 yil davom etdi.
2026-yil 26-oktyabr kuni Investitsiyaviy nizolarni hal etish bo‘yicha xalqaro markaz (ICSID) arbitraj tribunali Turkiya fuqarosi Mehmet Zeki Obuz va boshqalarning O‘zbekiston Respublikasiga qarshi qo‘zg‘atgan xalqaro arbitraj ishi yuzasidan qaror qabul qildi.
Qarorga muvofiq, da’vogarlar tomonidan O‘zbekiston Respublikasiga qarshi ilgari surilgan barcha da’vo talablari rad etildi.
Ushbu investitsiyaviy nizo O‘zbekiston Respublikasi va Turkiya Respublikasi o‘rtasida 1992-yilda tuzilgan investitsiyalarni o‘zaro rag‘batlantirish va himoya qilish to‘g‘risidagi ikki tomonlama bitim asosida qo‘zg‘atilgan bo‘lib, 2021-yil iyun oyida boshlanib, 5 yil davom etdi. Arbitraj tribunali e’lon qilgan qaror nizolashuvchi tomonlar uchun yakuniy hisoblanadi.
Mazkur arbitraj ishida davlat manfaatlarini O‘zbekiston Respublikasi Adliya vazirligi hamda “Curtis, Mallet-Prevost, Colt & Mosle” xalqaro yuridik kompaniyasi (AQSH) himoya qildi.
