Qozog‘istonga safarlar osonlashadimi? Ikki davlat chegaradan o‘tish tartibini muhokama qildi
QazETA tizimida o‘zbekistonliklarga imtiyoz berilishi mumkin.
O‘zbekiston va Qozog‘iston fuqarolarning o‘zaro safarlarini osonlashtirish, jumladan, davlat chegarasini shaxsni tasdiqlovchi hujjatlar yordamida kesib o‘tish imkoniyatini ko‘rib chiqmoqda. Bu haqda Tashqi ishlar vazirligi matbuot xizmati xabar berdi.
11-noyabr kuni O‘zbekiston tashqi ishlar vaziri o‘rinbosari Olimjon Abdullayev Qozog‘istonning mamlakatimizdagi elchisi Yeral Tugjanov bilan uchrashdi.
Muzokaralarda fuqarolarning huquq va qonuniy manfaatlarini himoya qilish, o‘zaro sayohatlarni yengillashtirish hamda davlat chegaralarini kesib o‘tishdagi to‘siqlarni bartaraf etish masalalari muhokama qilindi.
Xususan, chegaradan o‘tishda shaxsni tasdiqlovchi hujjatlardan foydalanish imkoniyati yuzasidan fikr almashildi. Shuningdek, Qozog‘istonda joriy etilayotgan QazETA elektron kirish ruxsatnomasi tizimida O‘zbekiston fuqarolari uchun ayrim imtiyozlar berish imkoniyati ham ko‘rib chiqildi.
Bundan tashqari, Qozog‘istonda O‘zbekiston fuqarolarini uyushqoqlik bilan ishga joylashtirish, tegishli qonunchilik bazasini takomillashtirish va fuqarolarning ikki davlat hududida bo‘lishi uchun qulay sharoitlar yaratish masalalari muhokama qilindi.
Uchrashuv yakunida tomonlar muloqotni davom ettirish va belgilangan yo‘nalishlarda amaliy hamkorlikni rivojlantirishga tayyor ekanliklarini bildirdi.
