Qirg‘iz—tojik chegarasiga KXSHT kuchlari joylashtirilishi mumkin
Bu haqda Qirg‘iziston Mudofaa vazirligi ma’lum qildi.
Qirg‘iziston Tojikiston bilan chegaradagi vaziyatni yumshatish maqsadida yaqinda mojaro kuzatilgan hududga KXSHT harbiy kontingentini joylashtirishni maqsadga muvofiq deb hisoblaydi. Bu haqda Bishkekdagi matbuot anjumanida Qirg‘iziston Mudofaa vazirligi rahbari Baktibek Bekbolotov ma’lum qildi.
“Ikki davlat o‘rtasida hakam turmaguncha chegarada tinchlik va osoyishtalik bo‘lmaydi. Texnikalarni olib chiqib ketish va o‘t ochishni to‘xtatishni nazorat qilish uchun bahsli hududlarga KXSHTning kichik kontingenti joylashtirilishi mumkin”, — deydi Bekbolotov.
Uning so‘zlariga ko‘ra, Dushanbe bilan bahsli hududlar bo‘yicha konsensusga erishish ancha qiyin bo‘ladi, chunki har bir tomonning “o‘z haqiqati” bor. Vazirning qo‘shimcha qilishicha, Qirg‘iziston—Tojikiston chegarasida KXSHT harbiylari paydo bo‘lganidan keyingina chegarani demarkasiya va delimitasiya qilish jarayonini davom ettirish mumkin bo‘ladi.
