Oʼzbekiston — Ozarbayjon diniy idoralari oʼrtasida memorandum imzolandi
Uchrashuvda ikki davlat rahbarlarining diniy-maʼrifiy sohaga qaratayotgan alohida eʼtiborlari natijasida koʼplab xayrli ishlar amalga oshirilayotgani ta'kidlandi.
Oʼzbekiston musulmonlari idorasi Matbuot xizmati xabariga ko’ra, kecha, 19-oktabr kuni Boku shahriga tashrif doirasida Muftiy Nuriddin domla hazratlari hamda Ozarbayjon musulmonlari idorasi raisi, Shayxulislom Ollohshukur Poshozoda o’rtasida uchrashuv tashkil etildi.
Muloqotda tomonlar ikki mamlakat xalqlari oʼrtasidagi doʼstlik va qardoshlik rishtalarini yanada mustahkamlash, diniy sohadagi hamkorlikni rivojlantirish va oʼzaro tajriba almashish maqsadida, hamkorlik qilish toʼgʼrisidagi Memorandumga imzo chekdilar.
Shuningdek, uchrashuv davomida Oʼzbekiston va Ozarbayjon davlat rahbarlarining saʼy-harakatlari, diniy-maʼrifiy sohaga qaratayotgan alohida eʼtiborlari natijasida koʼplab xayrli ishlar amalga oshirilayotgani, Sharqu Gʼarbni oʼzaro bogʼlagan, buyuk sivilizatsiyalar tutashgan Turkiy xalqlar zaminidan yetishib chiqqan minglab olimlar, mutafakkirlar Islom dini rivojiga juda katta hissa qoʼshganlari, ikki davlat diniy idoralari oʼrtasida aloqalarni yanada mustahkamlash har tomonlama zarurligi toʼgʼrisida oʼzaro fikr almashildi.
