Namanganda maktab direktorlariga ko‘mir yonida rasmga tushish buyurildi
Holatga viloyat XTB izoh berdi.
Ijtimoiy tarmoqlarda Namangan viloyati Chust tuman xalq ta’limi bo‘limining telegram kanalida har bir maktab direktori ko‘mirxona oldida rasmga tushib, rahbariyatga yuborishi kerakligi haqida xabarlar tarqaldi. Holat yuzasidan viloyat xalq ta’limi boshqarmasi axborot xizmati rasmiy munosabat bildirdi.
Qayd etilishicha, ta’lim muassasalarining ko‘mirxonasi yonida tushilgan rasmni jo‘natish mazmunida xabar yuqori turuvchi tashkilotlar tomonidan berilmagan. Mazkur xabar tuman xalq ta’limi bo‘limi telegram kanaliga mas’ul shaxs tomonidan anglashilmovchilik sabab ketib qolgan va bu borada tuman xalq ta’lmi bo‘limi mudiri, telegram admini kelgusida haqiqatdan yiroq va noo‘rin xabarlarni joylamasligi yuzasidan jiddiy ogohlantirilgan.
