Prezident issiqxonalarning gazdan uzilish holatini zudlik bilan ko‘rib chiqishni buyurdi
Bu topshiriq ijrosini shaxsan Administratsiya rahbari Sardor Umurzaqovning o‘zi nazorat qiladi.
Issiqxonalarni gaz taʼminotidan uzish holati bo‘yicha tadbirkorlarning noroziligidan xabar topgan Shavkat Mirziyoyev zudlik bilan mazkur masalani ko‘rib chiqish uchun Administratsiya rahbari Sardor Umurzakovga tegishli topshiriq berdi.
Administratsiya rahbari boshchiligida o‘tgan majlisda issiqxonalarni tabiiy gaz taʼminotidan ogohlantirishsiz uzish holatlari bo‘yicha juda ko‘p eʼtirozlar bildirilayotgani, xususan 25 oktyabr kuni respublikaning turli hududlaridan issiqxonalari gazdan uzilgan tadbirkorlar norozilik bildirib, Toshkentda to‘plangani bo‘yicha tegishli masʼullar qattiq tanqid ostiga olindi.
"Jumladan, Vazirlar Mahkamasi va Qishloq xo‘jaligi vazirligi mutasaddi rahbarlarining ushbu masala bilan umuman shug‘ullanmagani uchun, tadbirkorlarning muammolariga yechim topmagani uchun ular Prezident Administratsiyasiga kelishmoqda", — dedi S.Umurzaqov.
