Tibbiyot xodimlari bodikamera bilan taʼminlanishi mumkin
Ayni paytda deputatlar tibbiyot xodimlari faoliyatiga oid qonun loyihasini muhokamadan o‘tkazishmoqda.
O‘zbekistonda tibbiyot xodimlarini ham bodikamera bilan taʼminlash taklif etildi.
Qayd etilishicha, Oliy Majlis Qonunchilik palatasi deputati Qizilgul Qosimova qonunchilikka kiritilayotgan bu o‘zgartishlar haqida fikr bildirgan.
«Tibbiyot xodimlariga tajovuz qilish bilan bog‘liq holatlar jamiyatimizdagi illatlardan biriga aylanib borayotgani juda achinarli. Buning oldini olishda eng samarali yo‘l noqonuniy xatti-harakatlar uchun javobgarlikni kuchaytirish, deb hisoblayman. Fikrimcha, basharti shaxs ayni vaqtda jamoat tartibini buzayotgani va jamiyatga nisbatan ochiqdan-ochiq hurmatsizlik qilayotganini ham yaqqol anglagan bo‘lsa, qilmish bezorilik sifatida kvalifikatsiya qilinishi lozim», — degan deputat.
Shu maqsadda Jinoyat kodeksining bezorilik uchun javobgarlikni ko‘zda tutuvchi normasiga jinoyatning o‘z xizmat yoki fuqarolik burchini bajarayotgan shaxsga yoki uning yaqin qarindoshlariga nisbatan sodir qilganini nazarda tutuvchi qo‘shimcha band kiritish kerakligi taʼkidlangan.
Ushbu bandda nazarda tutilgan jinoyatni sodir etishda aybdor, deb topilganlar uch yildan besh yilgacha ozodlikdan mahrum qilish bilan jazolanishi mumkin bo‘ladi.
“Ichki ishlar organlari xodimlarida ana shunday moslamalar mavjud. Ayni paytda 3 ming nafarga yaqin tibbiyot xodimi mavjud deb hisoblasak, ushbu masalani hal qilish katta mablag‘ talab qilmasa kerak. Aksincha, bu orqali fuqarolarning ham, tibbiyot xodimining ham masʼuliyati oshadi, zo‘ravonliklarga barham beriladi”, deya qo‘shimcha qilgan Qizilgul Qosimova.
Shu bilan birga, ko‘chada tez yordam mashinasiga yo‘l bermaslik holatlariga nisbatan ham jarimalar hajmini ko‘paytirish kerakligi, xususan, tibbiyot xodimi, tibbiy yordam kabi tushunchalarga taʼrif berilib, tibbiyot xodimlari faoliyatiga aralashganlik qonunchilikda tegishli tartibda javobgarlikka sabab bo‘lishi belgilanishi zarurligi taʼkidlangan.
