Rossiya Xersondan chekinadi
Shahar 3-mart kuni egallab olingandi.
Rossiya Xersondagi qo‘shinlarini Dneprning chap qirg‘og‘iga evakuasiya qiladi. Mamlakat mudofaa vaziri Sergey Shoygu Ukrainadagi rus qo‘shinlari qo‘mondoni Sergey Surovikinga shu mazmunda topshiriq berdi.
Surovikin qo‘shinlarning olib ketilishi yaqin kunlarda amalga oshirilishini aytgan.
“Shakllangan vaziyatni har tomonlama baholab Dnepr daryosi chap qirg‘og‘ida mudofaani shakllantirishni taklif qilaman”, – degan general.
U Ukraina qo‘shinlarini Kaxovka GESni portlatishga urinishlarda ayblagan. Shu bilan birga chekinish harbiylar hayotini saqlab qolish uchun amalga oshirilayotgani ta’kidlangan.
Shoygu ushbu taklifni qo‘llab-quvvatlagan.
Rus qo‘shinlari Ukrainaga bosqinning ilk kunlarida Xersonni egalla olgandi. Ushbu hududlarda rossiyaparast ma’muriyat tuzilgandi. 30 sentyabrda Xerson Rossiya tarkibiga qo‘shib olingani e’lon qilindi.
Ko‘plab tahlilchilar Xersonning boy berilishini Rossiya qo‘shinlarining strategik muvaffaqiyatsizligi sifatida baholamoqda. Ayrim manbalarga ko‘ra, Gʻarb davlatlari Ukrainaga ushbu shaharni ozod qilgach, Moskva bilan muzokara boshlashni taklif qilgan.
