Bayden: Ukrainaning o‘zi hududiy yon berish masalasini hal qilishi kerak
AQSH yetakchisi Vashington Uchinchi jahon urushi boshlash niyatida emasligini aytdi.
AQSH Ukrainani parvozlardan holi hudud deb eʼlon qilishdan voz kechdi. Jozef Baydenning so‘zlariga ko‘ra, Qo‘shma Shtatlar uchinchi jahon urushini boshlamoqchi emas.
Oq uydagi matbuot anjumanida AQSH Prezidentidan Ukrainaga doimiy asosda yordam ko‘rsatish masalasi so‘ralgan.
"Men shuni kutyapman. Shu bilan birga, biz Ukrainaga kart-blansh taqdim etmayapmiz. Ular uchun ko‘p narsa qildik. Masalan, mendan Ukrainani parvozlardan holi hududga aylantirishda AQSH samolyotlaridan foydalanishni ko‘p so‘rashdi. Ammo biz buni amalga oshirmaymiz. Rossiya samolyotlarini urib tushirib, Uchinchi jahon urushini boshlamoqchi emasmiz", — degan Bayden.
Bundan tashqari, Prezident ukrain armiyasi Rossiya shaharlarini bombardimon qilishini istamasligini aytgan va shuning uchun 965 km uzoqlikka uchadigan raketalar bermaganini qayd etgan.
Hududiy yon berishlar haqida gapirar ekan, Bayden bu masalani Kiyevning o‘zi hal qilishi kerakligini taʼkidlagan. U ushbu masalada Vashington Ukrainaga bosim o‘tkazmasligini qo‘shimcha qilgan.
Avvalroq Rossiya qo‘shinlari Xersondan chekinishi to‘g‘risida xabar berilgandi.
