IIB muassasasida 15 yoshli bolaning vafot etgani ortidan 10 kishi jazolandi
Jumladan, voyaga yetmaganlarga ijtimoiy-huquqiy yordam ko‘rsatish markazi boshlig‘i va 2 xodim ishdan ketgan.
Avvalroq Qo‘qon shahridagi voyaga yetmaganlarga ijtimoiy-huquqiy yordam ko‘rsatish markazi yotoqxonasida ikki nafar voyaga yetmagan tarbiyalanuvchilar o‘zi bilan birga tarbiyalanayotgan voyaga yetmagan R.A.ga tan jarohati yetkazishi oqibatida vafot etgani xabar qilingandi. Shundan so‘ng 2 nafar xodim IIO xizmatidan bo‘shatilgandi.
Viloyat IIBning qayd etishicha, tegishli xizmatlar tomonidan o‘tkazilgan xizmat tekshiruvi yakunlangan. Unga ko‘ra, ushbu markaz boshlig‘i egallab turgan lavozimidan ozod etilgan.
Shuningdek, xizmat faoliyatida yo‘l qo‘ygan kamchiliklari uchun 3 nafar xodimga “Hayfsan” intizomiy jazosi tayinlangan. 4 nafar xodimning esa lavozimiga loyiq yoki noloyiqligini aniqlash maqsadida navbatdan tashqari attestasiyadan o‘tkazilishi belgilandi.
