Britaniyaning yangi Bosh vaziri ilk bor Ukrainaga keldi
Rishi Sunak Zelenskiy bilan uchrashdi.
Prezident Vladimir Zelenskiy Ukrainaga ilk bor tashrif buyurgan Buyuk Britaniya bosh vaziri Rishi Sunak bilan uchrashdi.
Zelenskiy Sunakning tashrifi ikki davlat uchun nihoyatda mazmunli va foydali bo‘lganini ta’kidladi.
"Birinchi navbatda, Bosh vazirga Ukrainani prinsipial qo‘llab-quvvatlagani va muzokaralarimizdagi maksimal konstruktivlik uchun minnatdorchilik bildiraman. Bugun biz mamlakatlarimiz va global xavfsizlik uchun muhim bo‘lgan barcha masalalarni muhokama qildik", — dedi prezident.
Zelenskiy Britaniya Bosh vaziri Rishi Sunakga Rossiya raketa zarbalari oqibatlari haqida ma’lumot berdi. Xususan, uning so‘zlariga ko‘ra, bugungi kungacha Ukraina energetika infratuzilmasining yarmiga yaqini shikastlangan.
Uchrashuvda tomonlar Ukraina va Yevropaning energiya xavfsizligini himoya qilish imkoniyatlarini muhokama qildilar.
"Janob Rishi Sunak va uning jamoasi aytgan takliflar mazmunli va juda yaxshi tayyorlangan. Biz sizga ishonamiz", - deya qo‘shimcha qildi Vladimir Zelenskiy.
U, shuningdek, yaqin kelajakda kuchga kirishi kerak bo‘lgan Rossiya energiya resurslarining eksport narxini eng samarali cheklash muhimligini ta’kidladi.
