Mo‘g‘uliston bosh vaziri xalqiga murojaat qilib, tinchlanishga chaqirdi
Mamlakatda yirik miqdorda ko‘mir o‘g‘irlanishi bilan bog‘liq mojaro avj olmoqda.
Mo‘g‘uliston Bosh vaziri Luvsannamsrayn Oyun-Erdene xalq oldiga chiqib, davom etayotgan norozilik namoyishlari fonida aholini xotirjam bo‘lishga chaqirdi va tartibsizliklarga sabab bo‘lgan ko‘mir o‘g‘irlanishini tekshirishga vaʼda berdi.
"Biz imkon qadar tezroq tergov o‘tkazish ustida ishlayapmiz. Sizdan xotirjam bo‘lishingizni so‘raymiz", — dedi bosh vazir.
Dushanba kuni Mo‘g‘uliston poytaxti Ulan-Batordagi Hukumat saroyi oldida bir necha ming kishi ishtirok etgan namoyish bo‘lib o‘tdi.
Odamlar ko‘mir o‘g‘irlanishi bilan bog‘liq vaziyatdan norozi. Gap 1,8 milliard dollar haqida ketmoqda. Mamlakat adliya vazirining so‘zlariga ko‘ra, Mo‘g‘uliston hukumati diplomatik kanallar orqali Xitoy rasmiylaridan ko‘mir ishi bo‘yicha tergovga qo‘shilishni so‘ragan, chunki Mo‘g‘uliston o‘z eksportining qariyb 86 foizini Xitoyga jo‘natadi va bu hajmning yarmidan ko‘pi ko‘mir. Mo‘g‘ulistondan eksport qilinadigan ko‘mir miqdori Xitoy tomoni olgan miqdordan farq qiladi. Maʼlumotlarga ko‘ra, Pekin Ulan-Batorga bu ishga aloqador mo‘g‘ul siyosatchilarining ismlarini topshirgan.
