Yozuvchi Sobir O’nar 58 yoshida vafot etdi
U bir qancha hikoyalar to’plami muallifi bo’lgan.
O‘zbekiston Yozuvchilar uyushmasi a’zosi, iste’dodli adib Sobir O‘nar 58 yoshida vafot etdi. Bu haqda “O’zA” axborot agentligi xabar berdi.
Sobir O‘nar 1964-yil 25-fevralda Samarqand viloyatining Qo‘shrabot tumanidagi Quvkalla qishlog‘ida tug‘ilgan. 1986-yilda Toshkent Davlat universitetida (hozirgi Mirzo Ulug‘bek nomidagi O‘zbekiston Milliy universiteti)ning jurnalistika fakultetini tamomlagan.
Sobir O‘narning ilk hikoyasi — “Kunsuluvning xatlari”. Shundan so‘ng yozuvchining “Orzuga to‘la qishloq”, “Ovloq adirlar bag‘rida”, “Chashma”, “Kunsuluvning sirli xatlari” hikoyalar to‘plamlari nashr etilgan.
Sobir O‘nar qoraqalpoq adibi X.Tojimurodovning “Ov hangomalari” hamda turk yozuvchisi Bakir Yulduzning “Karbalo fojiasi” qissasini o‘zbek tiliga tarjima qilgan.
