JSST koronavirusning yangi to‘lqini boshlanishidan xavotirda
Omikron shtammining yangi subvarianti 29 mamlakatda ro‘yxatga olindi.
Jahon sog‘liqni saqlash tashkilotining maʼlum qilishicha, “omikron” shtammining yangi XBB.1.5 subvarianti 29 mamlakatda ro‘yxatga olindi. Qolaversa, u bir necha hafta ichida AQSHda dominant versiyaga aylandi. Hozir yangi mutatsiya Yevropa mamlakatlarida ham keng tarqalmoqda.
“Biz o‘sish surʼatlaridan tashvishdamiz, — deydi JSST eksperti Mariya Van Kerxove. — Chunki hozirgacha maʼlum variantlar orasida XBB.1.5 ning yuquvchanligi yuqori. Xavotirli jihati, u dunyoda koronavirus pandemiyasining yangi to‘lqiniga sabab bo‘lishi mumkin".
Tashkilot rahbari Tedros Gebreyesus ham 2022 yil oxirida aniqlangan mazkur mutatsiya haqida to‘xtalar ekan, u “omikron” BA.2 versiyasining rekombinanti ekanligini taʼkidladi.
“Dunyo bo‘ylab kasallanishning yangi to‘lqini kutilmoqda, — deydi u. — Ammo bu o‘lim ko‘rsatkichlari oshishiga olib kelmasligiga ishonamiz. Chunki biz o‘tgan davrda mazkur virusga qarshi kurashish borasida yetarli tajriba to‘pladik”.
Shundan kelib chiqib, mutaxassislar COVID-19'ga qarshi buster dozada emlanish eng to‘g‘ri chora ekanligini taʼkidlamoqda.
